Mongghoe patèḍoengnga na’-kana’ sè bhāghoes pokol bālloe’. Mon na’-kana’ la asakola, sabelloenna pokol bālloe’ kodhoe djhār-adjhārān. Kalamon bā’na tèḍoenga bāssoè ghālloe sokona pabhersè. Padjhāghāna palagghoei, djhā’ kongsè kasèjāngen; mon ella djhāghā pas alalakon, nolongè pangghābājānna orèng towana, ijā arèjā: asapoan, abhās-ghebbhās rāng-bhārāng ḍālem romana bān salaènna. Samarèna alalakon pas mandi, aossoan pakongsè bhersè. Bilā marè mandi pas apangangghoej sè patot. Angghoejjā sè bhersè, sabāb angghoej kotor rèjā madāteng panjākèt: korèng, kèrkèr bān salaènna.

2. Adjhālan ka sakola’an

Baca Juga:Kenali Contoh Kata Antonim Bahasa Madura

Kalamon bā’na ella marè adhāndhān, pas kala’ pakakassa, ijā arèjā: lai, grip, djidāl bān èn-laènna pakakassa asakola. Pakakas djārèjā djhā’ kongsè bāḍā sè tjèttjèr. Saopama bā’na ghi’ ngadjhi, kodhoe ngala’ kora’anna.

Kalamon bā’na mangkata asakola otabā èntara ngadjhi bettjè’ amèt ghālloe ka orèng towana. Neng è djhālān bā’na djhā’ aghādjā’ bi’ tjā-kantjāna, lebbi bettjè’ ngènga’è pangadjhārānna. Djhā’ lè’-ngolè’ pambhoeroes bān bhoeroen alas laènna.

Sanapa’na è sakola’an pas larsèpè gribbhā, laina ghāris, sopadjā ta’ rèpota ḍālem pangadjhāran. Kalamon ella ranta, pas amaèn otabā djhār-adjhāran bi’ tjā-kantjāna. Tèngka polana ka tjā-kantjāna sè bhāghoes, tarèsna’a, tjā-kantjāna djārèjā angghep akanta tarètanna; djhā’ atokar bān apadhoe.

Baca Juga:"Umpama" dalam Bahasa Madura

3. Parèntana ghoeroe ka morèd

Kalamon ghoeroena ella abherri’ tanḍhā maso’ otabā èkaronèng, bā’na paḍā abhāris naro’ parèntana ghoeroena. Pamaso’na bā’na kodhoe adjālan on-laonan, djhā’ arebbhoe’ aḍā’; ladjhoe padā todjoe’ è bāngkoe kennengnganna sè bijāsa (djhā’ lè-ngallè). Patodjoe’na padjhekdjhek, tanangnga paḍā tompangngaghi è attas bāngkoe.

Pangadjhārānna ghoeroena èdingngaghi sarta pèkkèr, djhā’ lè-sakalè bā’na aghādjā’ ḍālem sakola’an. Bā’na djhā’ ngèndjhām pakakas ka kantjāna, molana paranta pakakassa.

Baca Juga:100 Contoh Kalimat Pertanyaan Bahasa Madura dan Artinya

Pangghābājān sè èsoro lakonè bi’ ghoeroena, lakonè bi’ ongghoe atè, pèkkèr sè massa’, sopadjā ta’ sala’a. Patodjoe’na djhā’ nonḍoe’, orèng sè bijāsa todjoe’ nonḍoe’ lekkas boengko’ sarta pangabāssa lekkas rabeng. Kalamon bā’na kalowara. abhānjoa otabā sabāb laènna, kodhoe njo’on parmèsi ghālloe ka ghoeroena bhāb sè èkaparlo.

4. Terrosanna parèntana ghoeroe ka para morèd